موعتادی کۆمەڵناس

ئیسە ئەو کەسانەی کە ماڵ درووست ئەکەن بۆ ئەوەی دزییان لێنەکرێ مەجبوورن شەوانە کەسێک لە ماڵەکە دانێن. ئاشنایەکی ئێمە کە خەریکە ماڵ درووست ئەکا ئەو کارەی کردوە. لە پەنای ئەو ماڵە، کەسێکیتریش ماڵەکەی تێک ئەدا ئەما کەسی بۆ ناگرێ کە ئاگای لێبێ. نزیکانی نیوەشەو لەو ماڵە کە تێک دراوە دەنگە دەنگ دێ. نیگەهبانی ماڵەکەیتر چەن جار بانگ ئەکا: ئاغای رۆستەمی. کەس جواب ناداتۆ. دووبارە: ئاغای رۆستەمی! کە ئەبینێ کەس جواب ناداتۆ. زەنگ لێئەدا بۆ پۆلیسی ١١٠. ئەچنە ناو ماڵەکە ئەبیننن کابرایەکی کز و لاواز بەفەرغوونێکەوە کە پڕە لە لەتە ئاسن و شتی وا لە ناو ماڵەکەدایە. لێی ئەپرسن تۆ کێی؟ ئەڵێ من ئاغای رۆستەمیم. ئێژن چ کارەی؟ ئەڵێ کارمەندم. مەعلووم ئەبێ کابرا موعتادە و هاتە بۆ دزی. ئەما موعتادێکی دزی کۆمەڵناس!
بۆ چی وتبووی ناوم رۆستەمییە و کارمەندم؟ چۆن زانیبووی ناوی خاوەنی ماڵەکە رۆستەمییە و کارمەندیشە؟ وەقتێک نیگەهبانی ماڵەکە چەن جار بانگ ئەکا ئاغای رۆستەمی، موعتادەکە ئەزانێ کە ئەبێ ناوی ساحێبماڵەکە رۆستەمی بێ. بەوەا کە ئەڵێ ئاغا و بە شۆرەت بانگی ئەکا ئەبێ کارمەند بێ. چونکە ئەگەر بازاری بێ دیارە ئەوە نە پێی ئەوترێ ئاغا و نە بە شۆرەت بانگی لێئەکەن وەکو کاکە یان حاجی و ... کەوابوو ئەڵێ کارمەندیشم.
ئەوە ئێمە بوایەتین هەوڵ ئەبووین و ئەمانوت شاگردبەناین وەستا وتیەتی دانیشە ئەوە ئیسە دیمەوە!!

دموکراسی یا جودایی

زۆر زەحمەتم بەو وتارەوە کێشا و ئەسڵەن باوەڕم نەئەکرد ئەبێ ئەو هەموە کاتەی بۆ سەرف کەم. پێم خۆشە بخوێندرێتەوە و لە بیر و رای خوێنەران ئاگادار بم. سپاستان ئەکەم دیتنی خۆتان لە سەر ئەم وتارە بنووسن:

http://radiozamaneh.com/society/humanrights/2012/08/18/18412

شتێکیتر کە ئەبێ باسی بکەم ئەوەیە کە من لە هیچ زانکۆیەکی کوردستان تەدریس ناکەم و ئەوەی کە نووسراوە ماموستای زانکۆکانی کوردستانم هەڵەیە.

رفاندن و گفتوگۆ

حسەین ئایگون نوێنەری خەڵکی دەرسیم لە پەڕلمانی تورکیە کە چەند رۆژ لە مە وبەر لە لایەن گریلاکانی پارتی کرێکارانەوە رفێندرا بو، دوای ئازاد بوون و لە وتووێژێکدا کە لە گەڵ کاناڵێکی تلێویزیۆنی تورکیەدا بووی نیشانیدا کە سیاسەتمەدارێکی بائەخلاق و لێهاتوە و دەنگی خەڵکی دەرسیم بە فیڕۆ نەچوە.

1. ئەگەرچی رفاندن و دەسبەسەرکردنی کەسێک خۆی لە خۆیدا جۆرێک لە بێحورمەتی تێدا بەدی ئەکرێ بەڵام بۆ ئەوەی حورمەتی کورد بپارێزێ و بەهانە نەدا بە دەست نەیارانی کوردەوە ئەڵێ هیچ بێحورمەتییەکیان پێنەکردوە و بە شێوەیەکی ئینسانی مامەڵەیان لە گەڵ کردوە.
2. هەروەها کە ئاماژە ئەکات بۆ کشانەوەی لە حیزبی جمهوری گەل لە لایەن گریلاکانەوە بە شێوەیەکی راستەوخۆ فەرمانی پێنەکراوە و تەنیا پێشنیاریان ئەوە بوە، هەمیسان حورمەتی کورد ئەپارێزێت. بەڵام خاڵی سەرنجڕاکێش وەڵامەکەیەتی بۆ ئەو پێشنیارە کە نیشاندەری خاوەنهەڵوێستییەتی بە مافی چارەی خۆ نووسین و تەئکیدکردن لە سەر پرەنسیبەکانی گفتوگۆ. باسکردن لە ئەندامەتی لە حیزبی سیاسی یان تەنانەت پێشنیاری! کشانەوە لە حیزبێک لە دۆخ و فەزایەکی میلیتاری و لە کەمپدا ناوی "گفتوگۆ" نیە. لە لایەکیتریشەوە ئەمە پەیوەندی بە ئیرادە و خواستی تاکەوە هەیە و مافی هەر مرۆڤێکە کە ئازادانە رێگە و رەوشتی سیاسی و چارەنووسی خۆی دیاری بکات.
3.  ئایگۆن زۆر راشکاوانە تەئکید لە سەر ئاشتیخوازی، دژایەتی لە گەڵ توندوتیژی و تووشایەتی و هەڵگرتنی هەنگاوی عەمەلی لە پێناویاندا ئەکات و ئەشزانێ کە زۆر کەس و لایەن لە هەر دوو لاوە ئەمەیان لا پەسەند نیە و هەر دوو لا بە دوژمنی خۆیانی ئەزانن. 
4. پەیامی سەرەکی ئەم وتووێژەیش هەر ئەمەیە کە لە حاڵەتێکی ناوازەدا لایەنە دژبەرەکان کە باوەڕیان بە مافی مرۆڤ و ئاشتی و چالاکی سیاسی مەدەنی و هێمنانە نیە لە دژایەتی لە گەڵ وەها کەسانێکدا هاوڕان بە یەک جۆر هەڵسوکەوتیان لە گەڵ ئەکەن. لە راستییدا ئەم بیر و باوەڕ و ئەم جۆرە هەڵوێستانە بۆ هەر دوو لا مەترسیدارە.